Mga obispo, pari ug layko di pasunogon og basura

CEBU, Philippines - Si Arsobispo Ricardo Cardinal Vidal mipagawas og circular o kamanduan ngadto sa mga obispo, kaparian ug mga layko sa artsidyosesis sa Sugbu nga dili na mosunog sa bisan unsang matang sa basura.

 Kini agi og tabang sa Simbahan sa kasulbaran dili lamang dinhi sa nasud kun sa tibuok nga kalibutan sa suliran sa “global warming” ug “climate change."

 Ang kamanduan ni Cardinal Vidal nga nagpublikar sa Bag-ong Lungsuranon nagkanayon nga ang pagsunog sa bisan unsang matang sa basura momugna og makadaot nga aso.

Kini sama sa “carbon dioxide” o ba kaha “methane" nga maabot sa kawanangan ug magpabilin kini didto hangtod nga mobaga ug makaingon nga di makahungaw ang kainit sa adlaw nga mosulod sa kalibutan.

“Let us also learn to segregate our garbage and always clean our respective surroundings,” hangyo sa Cardinal. Si Vidal mipahimangno usab sa mga magtutuo sa Simbahang Katoliko nga mananom og daghang mga kahoy ug pag-atiman niini.

 Matud pa ni Vidal nga kining maong matang sa “social awareness and responsibility” makatabang na aron mapugngan ang dagkong baha sa umaabot nga adlaw sama sa nahitabo sa Luzon paglampurnas sa bagyong Ondoy ug Pepeng diin gatusan sa mga kinabuhi ang nakalas, ingon man ang pagpabalik.

Sa mga nanag-iya og mga sakyanan, si Vidal miawhag usab kanila sa pagtan-aw kanunay sa ilang mga makina ug ipaubos kini og regular nga pagpasusi sa mekaniko o tune-up ilabi na niadto nga mga mobugwak og itom na kaayong mga aso.

Giawhag niya ang tag-iya sa mga smoke-belching nga mga sakyanan pagsubay sa Clean Air Act. “Our relentless and collective efforts on environmental care and our proactive support will be a big help in saving Mother Earth. Let us do it now before everything will be too late,” dugang pa ni Cardinal Vidal sa iyang kamanduan. – BANAT NEWS