Ombuds mosusi's overpricing sa boards

CEBU, Philippines - Bisan og wala pa mapahatod ang pormal nga reklamo ni Kapitan Mary Ann Delos Santos sa barangay Lahug, ang buhatan sa Visayas Ombudsman mopahigayon na og imbestigasyon labot sa giingong overpricing sa basketball boards ug lighted panaflex nga usa sa mga proyekto ni Kongresista Raul Del Mar sa amihanang distrito.

 Si Assistant Ombudsman for the Visayas Virginia Palanca Santiago miingon nga ilang susihon ang alegasyon sa kampo ni Delos Santos .

 Matud pa ni Santiago nga nanguha na sila karon og mga newspaper clippings aron masugdan ang pagsubay sa pasangil samtang wala pay pormal nga reklamo nga madawat ang buhatan sa Ombudsman.

 Dugang pa ni Santiago nga mas masayon ug madali ang ilang imbestigasyon sa maong isyu samtang wala pa ang eleksiyon kun moduso og pormal nga reklamo si Kapitan delos Santos.

 Samtang si delos Santos nagkanayon nga ila pa una gipaabot ang dugang mga dokumento nga matumbok sa kalambigitan ni del Mar sa maong kontrobersiya.

 Nasayran nga ang matag boards sa basketball mokabat sa kapin sa P11 mil samtang ang panaflex mokantidad og P14 mil, apan sila si delos Santos ug opposition leader Jonathan Guardo nga naghatagan usab niini miingon nga overpriced kini kay ang basketball boards mokantidad ra og P1,500 ngadto sa P2 mil matag usa samtang ang panaflex P2 mil ngadto sa P4 mil ang usa ka board.

Ang maong mga boards gipapalit sa Department of Public Works and Highways nga migamit og pundo gikan sa Department of Budget and Management, nagtuo si delos Santos nga tungod kay pulos man gitagana sa kabarangayan sa north district ang maong mga boards nagduda siyang dunay kalambigitan niini si del Mar. – BANAT NEWS