Balay sa Badian naugdaw gyud

CEBU, Philippines - Naugdaw ang usa ka panimalay nga gipanag-iya sa usa ka retired teacher sa sunog nga nahitabo sa barangay Poblacion, lungsod sa Badian kagahapon sa buntag.

Matud ni PO3 Joel Caballero sa Badian Police Station sa dihang nahinabi sa Banat News nga ang balay gipanag-iya sa pamilyang Kentin Taboada, nga retiradong magtutudlo.

Ang sunog gipaubos lang sa second alarm ug nakahatag usab og gamay’ng kabalaka sa mga magtutudlo ug mga tinun-an sa Badian Central School tungod kay ang balay nahimutang duol sa tunghaan.

Si FO3 Joselito Villarubia sa Badian Fire Station mibanabanang nadawat nila ang alarma alas 7:15 sa buntag ug sulod lang sa pipila ka minutos nakontrolar ang kalayo nga wala na makakaylap sa sikbit nga mga balay apan hingpit usab kining naugdaw.

Subay sa inisyal nga imbestigasiyon nasayran nga sa electrical wiring naggikan ang kalayo apan padayon pa kini karong gipaladman og pakisusi sa kabomberohan ingon man ang pagbanabana sa kinatibuk-ang danyos niini.

Lakip sa mirespondi mao ang kabomberohan sa sikbit nga mga lungsod sama sa Moaboal, Alegria, Malabuyoc ug Ginatilan.

Walay gikatahong naangol ug nakalas sa sunog. (Darrel A. Carumba)