Castro gipa-refund sa DOJ

CEBU, Philippines - Ang Department of Justice mimando kang Assistant Prosecutor Mary Ann Castro sa pag-uli sa iyang tulo ka buwan nga sweldo nga iyang nadawat niadtong tuig 2005 sa dihang gipaubos kini sa preventive suspension human gibasura ang iyang motion for reconsideration.

Sa suwat ni Justice Secretary Agnes Devanadera niadtong Agosto 26 gibasura niini ang hangyo ni Castro nga bakwion ang memorandum nga nagmando kaniya pag-refund sa sobra P100, 000 nga sweldo ug transportation allowance lakip na ang inquest allowance nga iyang gidawat bisan og siya nasuspenso niadto.

Si Devanadera mibutyag nga samtang si Castro ubos sa suspension i-hold usab ang sweldo ug mga allowance niini.

Si DOJ Assistant Secretary for Finance and Management Arthel Caronongan mipahibalo na kang Castro nga epektibo karong buwana hangtod sa Pebrero sunod tuig ang sweldo niini matag buwan kaltasan og P15,050.40 ug P4,800 gikan sa iyang RATA.

Si Castro gimanduan sa pag-refund P99,252.00 nga sweldo samtang ubos siya sa suspension ug P13,085.59 nga special allowance nga iyang gikolekta.

Ang refund sa special allowance   ikaltas gikan sa second quarter niining tuiga.

Si Castro ang nakakobra sa iyang sweldo bisan nasuspenso kini tungod kay si City Prosecutor Nicolas Sellon giingong wala mopatuman sa suspension order.

Si Sellon ang giingong mi-exempted ni Castro sa pag-raffle sa mga kaso ug sa pagtungha ngadto sa korte.

Ang preventive suspension order ang giluwatan niadtong Abril 11, 2005 tungod sa kasong bribery nga gisang-at sa buhatan sa Ombuds ngadto sa Sandiganbayan batok kang Castro. Ang maong kaso dunay kalambigitan sa giingong pagdawat ni Castro og P10,000 gikan sa usa ka abogado aron dili siya mo-object sa motion for bail ngadto sa korte sa suspetsadong drug personality.

Apan ang maong pasangil   gihimakak ni Castro ug nagkanayon kini nga ang abogadong si Gines Abellana   mibilin sa kwarta sa iyang opisina bisan pa og nagdumili siya sa pagdawat niini. – BANAT NEWS