Tulo ka polis abswelto sa kasong pagpangilkil

CEBU, Philippines - Tulo ka mga polis sa lungsod sa Moalboal Police Station nga nasikop sa entrapment operation sa National Bureau of Investigation tungod sa pagpangilkil niadtong tuig 2006, ang naabswelto sa kasong direct bribery.

Ang nakalingkawas sa kasong pagpangilkil mao sila si SPO2 Gerry Villarin, PO3 Estaneslao Avenido ug PO2 Godofredo Amancio nga kanhi nadestino sa Moalboal Police Station.

Si RTC-7 Judge Eric Menchavez nagkanayon diha sa iyang pito ka pahinang desisyon nga gipakanaug kagahapon sa buntag nga makaduda ang mga testimonya sa reklamanteng sila si Elizabeth Gallardo ug sa dinakpang anak niini nga si Mark James Gallardo.

Si Elizabeth Gallardo sa iyang affidavit miasoy nga niduol siya ug nagpakitabang sa NBI tungod kay gipangayoan siya og 35 mil pesos bugti sa pagbuhi sa iyang anak nga si Mark James Gallardo sa maong mga polis nga nadakpan tungod sa paghupot og illegal nga drugas.

Ang NBI midakop sa maong mga polis pinaagi sa entrapment operation atubangan sa Palace of Justice dihang gidawat ang marked money nga 35 mil pesos.

Apan sigon pa sa desisyon ni Judge Menchavez nga wala magkatukma ang testimonya sa mga testigos ilabina sa inahan hinungdan nga ang tulo ka mga polis naabswelto sa maong kaso. – BANAT NEWS