Ecleo ipresentar sa iyang abogado

CEBU, Philippines - Ang testigong ipresentar sa depensa sa kasong parricide sa pagpatay kang Alona Bacolod mao mismo ang suspek nga si PBMA Supreme Master Ruben Ecleo Jr. sumala pa sa abogado niining si Atty. Orlando Salatandre.

Ang maong kaso kasamtangang gihusay diha sa sala ni RTC-7 Branch 10 Judge Soliver Peras kun mahitabo gyung dunay hearing sa maong kaso pinaagi sa pagdawat sa ilang motion sa pagpresentar sa ilang mga ebidensya ug testigos.

“According to him, he is willing to testify and I like that. Yun ang gusto niya," sigon pa ni Atty. Salatandre sa interview sa DyRF.

Apan gitataw ni Salatandre nga ila pang tun-an og maayo kun gikinahanglanon pa bang ipresentar si Ecleo isip testigos sa maong kaso base usab sa kalig-on sa mga ebidensya sa prosecution.

Gipasabot usab ni Salatandre nga wala gituyo ni Ecleo ang pagpalta pagtambong sa hearing niadtong adlaw nga Miyerkules dili tungod sa sakit kun dili wala mahatagi og notisya si Ecleo nga patambungon sa maong hearing tungod kay usa lang kadto ka argumento sa dugay na kaayo nga pending nga motion.

Gipasalig hinuon si Ecleo motambong sa sunod nga hearing karong Oktobre 28 ning tuiga kay ang iyang kliyente agi og pagpakita nga interesado kining mahuman og dali ang kaso.

Sa iyang bahin. si Atty. Fritz Quiñanola sa interview sa DyRF nagkanayon nga giinsister gyud sa abogado ni Ecleo ang pagpresentar og dali sa ilang mga testigos ug mga ebidensiya aron malangay gyud ang pagdungog sa korte ang ilang motion nga nagtinguha sa paglibkas sa usa ka milyon nga piyansa ni Ecleo kay piskay na ang lawas niini ug dili na sama sa “walking time bomb” tungod sa sakit sa kasingkasing. – BANAT NEWS