Wanted mga kriminal nasikop

CEBU, Philippines - Nasikop sa kapolisan sa dakbayan sa Talisay niadtong Martes sa buntag ang usa ka wanted nga criminal sa maong dakbayan kinsa suspetsado sa pagpatay sa usa ka drayber sa habal-habal. 

Ang nasikop mao si Bebert Tabliga alyas Herbert Tabliga, taga sitio Cambawog, barangay Jaclupan sa nahisgutang siyudad, kinsa nag-atubang sa kasong murder sa sala ni Regional Trial Court (RTC) Judge Estela Alma Singco sa Branch 12.

Si SPO2 Jerome Abatayo ug PO3 Arnold Damasco sa Talisay City Police Station sa pakighinabi sa Banat News kagahapon mibutyag nga si Tabliga maoy suspek sa pagpatay sa usa ka drayber sa habal-habal nga si Juanito Echavez niadtong tuig 2007.

 Niadtong Martes sa buntag si Tabliga kinsa nagpaila nga si “Bebert Labura” miadto sa police station sa barangay Poblacion ug nangayo og panabang nga ipasikop si Richard Abella kinsa suspek sa pagpatay sa iyang manghod nga si “Ik-Ik” ug sa pagtulis patay kuno sa usa ka nursing student.

Apan nabantayan sa mga polis nga si Tabliga usa sa ilang gipangitang criminal, hinungdan nga ila kining gipugngan ug wala kini palakwa ni Damasco.

Samtang nagpundo si Tabliga sa buhatan sa polis, gikuha sa mga otoridad ang usa sa mga nakasaksi sa pagpusil patay kang Echavez kinsa positibong mitudlo kang   Tabliga nga maoy mipatay sa biktima.

Hinuon ang nahimutang nga ngalan sa warrant of arrest mao ang ‘Herbert Tabliga” apan ang tinuod nga ngalan sa suspek “Bebert Tabliga”.

Si Tabliga gihatod dayon ni SPO2 Abatayo ngadto sa sala ni Singco ug ang maong huwes maoy misukitsukit sa wala magkadimaong ngalan sa suspek.

 Apan dihang si Tabliga positibo gayung gitumbok sa usa ka saksi nga matud pa , maoy mipatay kang Echavez, wala na magpanuko si Singco sa dihadiha nga pagluwat dayon og commitment order batok kang Tabliga.

Ang igsoon ni Tabliga nga sila si Juvy, Roberto Jr., Jessie ug ang ilang amahan nga si Roberto Sr.kinsa nalambigit usab sa kasong pagpatay ug arson ,diha sa ilang lugar , pulos na usab nangasikop niadtong milabayng tuig ug anaa silang tanan karon nagtingkaghol sa prisohan. - BANAT NEWS