CEBU, Philippines - Ang mga biktima sa sunog sa barangay Umapad, dakbayan sa Mandaue misang-at kagahapon og kasong graft and corruption batok kang Mayor Jonas Cortes sa maong dakbayan.
Ang maong kaso nanukad sa giingong pagpanghatag sa mayor og mga substandard nga dapat sa panimalay ngadto sa maong mga biktima.
Usa sa mga mikiha kang Cortes mao si kagawad Helen Sungahid sa barangay Umapad ug si Evelyn de Leonardo nga maoy presidente sa kahugpongan sa mga lumolupyo sa sitio Limon ug sitio Mangga nga naigo sa sunog sa miaging bulan niining tuiga.
Si Mayor Cortes isip maoy chairman sa Bid and Awards Committee (BAC) maoy nag-una sa mga opisyal sa maong dakbayan nga gipasakaan sa maong kaso.
Ang sakop sa BAC nga nahilakip usab sa kiha mao si City Social Welfare officer-in-charge Violita Cabada ug ang tagdumala sa Central Lumber nga maoy supplier sa maong mga housing materials
Base sa ilang gipasakang reklamo ilang gipadayag nga gihatagan sila sa kagamhanan sa maong dakbayan og mga marine plywood nga nipis, ug reject ug mga GI sheet.
Si Mayor Jonas Cortes nga nahinabi sa mga tigbalita atol sa press conference nga gipahigayon kagahapon mipahayag usab nga wala siya makurat niining maong lakang sa mga nasunogan kay naanad na siya sa mga binuang sa oposisyon.
Iyang gitataw nga dili siya malisang niini ug andam siya sa pag-atubang sa maong kaso kay katungdanan niya ang pagpanubag sa mga reklamo sa iyang konstituwente bisan asa.
Hinuon si Atty. Francisco Amit sa Housing Urban Development Office (HUDO) nga nahinabi sa mga tigbalita miingon nga naghimo usab siya og pakisusi sa maong reklamo.
Matud pa niya nga dili reject ang maong mga plywood kon ang atubangan maoy tan-awon niini. – BANAT NEWS