CEBU, Philippines - Usa ang patay samtang upat ang nasamdan sa nahitabong panagbangga sa Ceres Bus ug usa ka delivery van kagahapon sa hapon sa lungsod sa barangay Tungkop sa lungsod sa Minglanilla.
Ang namatay giilang si Lucio “Junie” Villegas Jr., 24, delivery boy sa Charpling Square Enterprises nga nagbase sa dakbayan sa Sugbu taga Cambadbad, Matag-ob sa Leyte.
Samtang nangaangol mao ang kauban niining si Martin Remelado, drayber sa maong van nga taga V.Rama sa barangay Calamba ning dakbayan ug truck boy nga si Richie Morata taga barangay Tabok dakbayan sa Mandaue.
Naangol usab ang usa ka pasahero sa Ceres Bus nga si Wilfredo Cabanero ug usa ka babayeng giila lang sa pangalang Aurora. Sa report sa TV Patrol Central Visayas, ang bus nga adunay body number nga 8082 gimaneho ni Tirso Abria padulong sa Bato, Barili gikan pa sa dakbayan sa Sugbu samtang ang delivery van gikan sa south padulong na sa dakbayan.
Gihulagway nga kusog kaayo ang padagan sa delivery van ug uwahi na nga makahunong dihang mibutho ang maong bus hinungdan sa pagkagusbat sa maong van nga nagdala og mga tsetseria ug mga junk foods. Ang namatay nga maoy nagrabehan tungod sa pagkaipit daling gidala sa Minglanilla District Hospital uban sa mga nangaangol nga nakaangkon og mga pangos, garas ug bukol sa kalawasan ug sa ulo gumikan sa pagbangga.
Ang kapolisan sa Minglanilla nag-imbestigar pa kun si kinsa ang matumbok nga sad-an sa nahitabo alang sa pagpasaka unya sa kasong reckless imprudence resulting to homicide, physical injuries and damage to properties.
Kasamtangang gitanggong ang driver sa Ceres bus alang sa dugang mga imbestigasyon. (Lesley Caminade) (BANATNEWS)