Criminology grad gipatay sud sa lawak

CEBU, Philippines - Patay ang usa ka criminology graduate human gibulit og bala sa usa ka wala mailhing lalaking misulod sa iyang gipuy-an sa sitio Tana barangay Tisa pasado alas-kwatro sa buntag kagahapon.

Ang biktima nailhan nga si Felix Nilo Tabigue, 26, lumad nga taga barangay Nueva Estrella Buen Unido, Bohol.

Naabtan sa mga mirespondeng polis ang patay’ng lawas sa biktima nga nagbuy-od ibabaw sa iyang higdaanan nga nagmosketiro pa.

Ang biktima dunay samad pinusilan sa tuong bahin sa nawong ug milapos sa walang bahin sa iyang ulo ug maoy gituohang hinungdan sa hinanali niining kamatayon.

Samtang nakuha usab sa kapolisan sa crime scene ang duha ka kabhang sa kalibre.45 nga bala ug usa ka slug sa mao gihapon nga klase sa armas.

Nasayran nga sa wala pa mahitabo ang pagpatay, ang kauban sa panimalay sa biktima nga sila Gretel Gea Daclan ug usa ka menor de edad nagluto og pagkaon uban sa igsuon sa biktima nga si Shiela Mhie Tabigue.

Ang tulo mibutyag sa kapolisan nga nakabantay sila sa pagsulod sa usa sa mga mamumuno ug sa nagsilbing back-up.

Pipila ka minutos ang milabay buto na sa armas ang ilang nadunggan ug nakit-an nila ang gunman nga migawas sa kwarto sa biktima.

Sa kahadlok nga apilon sila pagpusil gipasagdan nalang nilang makagawas ang mamumuno.

Matud pa ni PO3 Geoffrey Gutual sa Cebu City Police Office, Homicide Section sa pakighinabi sa Banat News nga ang maong biktima nagtrabaho sa panimalay ni Daclan isip helper. Ang kapolisan nagsusi-susi pa sa background sa biktima sa tinguhang makakuha og lead sa motibo sa pagpatay sanglit gikatahong walay kasayuran ang mga kabanay ug ang gipuy-an niini nga duna kini nakaaway sa nanglabay’ng mga adlaw. (Lesley Caminade)   (BANATNEWS)