'Basketball terrorism' gisaway sa oposisyon

CEBU, Philippines - Gihulagway sa duha ka lider sa opposition nga sila si congressional aspirants Jonathan Guardo ug Kapitan Mary ann Delos Santos sa Lahug ning siyudad ang administrasyon ni Mayor Tomas Osmeña nga mihimo karon og “basketball terrorism.”

Kini dihang si Education Consultant Joy Agustus Young nga gidusong padaganon sa partido sa mayor pagka-bise mayor sa dakbayan, niadtong Biyernes mipalangkat sa basketball board ug gipapulihan og laing board nga iya sa kagamhanan sa siyudad sa sitio Golden Valley sa barangay Lahug.

Gikondinar ni Guardo ug Delos Santos ang maong pamaagi atol sa press conference kagahapon ug mihulagway sa gibuhat ni Young nga usa ka arogante, mapahimuslanon sa gahom.

Ang grupo ni Young nagpadala og mga sakop sa Special Weapons and Tactics (SWAT) team, SPEED personnel aron lang tangtangon ang basketball board sa opposition ug ipuli ang board nga naay pangalan ni Young.

Matud pang Delos Santos nga gihadlok niini ang barangay treasurer nga si Andrew Biton diha sa cellphone nga kung magdumili kini iyaha kining sumbagon ug padad-an og daghang polis.

Gitumbok ni Delos Santos ug Guardo nga may kalambigitan kini karon sa nagsingabot nga piniliay, apan wala mawad-i og paglaom ang oposisyon sanglit ila gihapong ipadayon ang pagpang apod-apod og mga boards sa nagkadaiyang sitio sa dakbayan kay usa kini sa ilang programa nga ang mga kabatan-onan malingaw pagdula og basketball ug malikay sa ginadiling drugas.

Matud pa ni Guardo nga mikabat na og usa ka libo ka basketball boards ang ilang nahatag sa mga sitio.

Giawhag ni Guardo ang mayor nga dili lang panghilabtan ang ilang gipanghatag ug gipangtaod na nga basketball boards tungod kay daghan pa kaayong walay boards dinhi sa dakbayan sa Sugbu.

“Karon kay hapit naman ang eleksyon nanggawas na ang BOPK boards, ako siyang hagiton (Osmeña) nga dili lang panghilabtan ang among gipanghatag nga boards kay daghan pa kaayong nagkinahanglan og boards ilabina kadtong nahimutang sa mountain barangays,” matud pang Guardo.

“Tinuod naay boards nga gibutang namo sa government owned kay unsaon man nga wa’ may pagtagad, “stop basketball terrorism” because we are not intimidated, kay dili kami ang biktima niini kundili ang mga batan-on apil na ilang mga ginikanan tungod sa problema sa drogas,” dugang pang Guardo.

Ilang giklaro nga kaugalingong bulsa ang ilang pagpamalit og boards aron ilang ikapanghatag sa mga nagkadaiyang sitio, sukwahi sa gihimo sa mga opisyal sa dakbayan nga kwarta sa kagamhanan ang gipamalit og boards.

Gihulagway usab ni Delos Santos nga gihimo lang kadto ni Young niadtong Biyernes aron siya mabalita ug mahisgotan sa media aron mailhan sa publiko.

Una nang gipadayag ni City Hall Education Consultant Joy Augustus Young nga wala mangilog ang siyudad pagtaod og mga basketball board tungod kay ang basketbolan nga gipangtauran iya sa kagamhanan sa dakbayan.

Ang pamahayag ni Young gidasunan usab ni acting mayor Michael Rama nga wala makauyon sa gihimo sa mga lider sa oposisyon apan iyang giklarong walay dautan sa lakang sa pikas grupo apan kung gusto sila mohimo sila og kaugalingong basketball courts ug di ang iya sa gobiyerno.   (BANATNEWS)