Nananom og marijuana hataga'g kwarta

CEBU, Philippines - Mihimo na og lakang karon si Undersecretary Paul Clarence Oaminal sa Dangerous Drugs Board (DDB) aron ipatuman ang (alternative development program (ADP) alang niadtong mga mag-uuma nga nag-atubang og kaso gumikan sa pagpananom og marijuana.

Kini sa dihang nadawat ni Usec Oaminal ang kamanduan gikan kang DDB Chairman Vicente “Tito” Sotto III sa miaging adlaw gumikan sa iyang nasayran kalabot sa nadakpang mag-uuma sa bukirang barangay sa lungsod sa Badian gumikan sa pagpananom og marijuana.

Nasayran nga mga sakop sa 78th Infantry Battalion sa Philippine Armed Forces of the Philippines (AFP) maoy nangibot sa mikaping 100 ka mga hamtong nang mga punuan sa marijuana ug may 30 ka mga lubangon o igtatanom pang mga punoan niini ang lakip nga gilarot.

Ang maong mga marijuana gihatod na sa mga sundawo ngadto sa buhatan sa Philippine Drug Enforcement Agency (PDEA) aron sa pagsunog niini.

Matud pa ni Sotto nga ang pagsikop sa mga mag-uuma dili maoy hingpit nga solusyon ning maong suliran.

Apan ang labing epektibong paagi aron moundang na sa pagpanaom og ginadiling tanom ang mga mag-uuma, mao ang paghatag kanila og pinansyal nga hinabang aron ipamalit nila og mga lubangon sa abaka nga maoy ilang ipananom imbes marijuana. Gipasabot ni Oaminal nga sayo ning tuiga miduaw si Sotto sa lungsod sa Balamban ug nakigsabot kang Mayor Alex Binghay sa maong lungsod nga hatagan og kapital ang mga mag-uuma nga nagpunay og palabong sa marijuana sa kalibunang bahin sa kabukiran sa maong lungsod.

Kini gumikan sa pagkapopular sa maong lugar kun hisgutan ang bahin sa pagpananom og marijuana.

Gumikan niini karong aduna nay mga taho nga may mga mag-uumang gipanghidakpan sa laing lugar sama sa Badian ug uban pang kalungsoran sa lalawigan, kinahanglang hatagan usab kini og suporta sama sa nawadat sa taga Balamban aron hingpit kining moundang nianang ilang bisyo nga pagpananom og marijuana.

 Sa pagkakaron mao kini ang dakong misyon ni Usec Oaminal sa pagpakigtagbo sa mga opisyal sa lungsod sa Badian ug ubang kalungsoran sa habagatan aron tunolan sa maong hinabang. – BANAT NEWS