Tindahan sa M'daue gitulis, robbery sa money changer sa Talisay gisusi pa

CEBU, Philippines - Gisakiyo sa duha ka wala mailhing tulisan ang halin sa usa ka tindahan sa barangay Alang-Alang, dakbayan sa Mandaue niadtong miaging adlaw.

Ang gitulis mao ang BN Enterprises nga gipanag-iya sa usa ka Maricel Mangubat, 34, nagpuyo sa maong dapit samtang ang duha ka tulisan giingong armado og kalibre .45 pistola.

Si PO3 Rossendo Cabrera nga nahinabi sa Banat News miingon nga ang duha mition sa mga kawani og armas dayong deklarar og tulis ug ang usa milayat ngadto sa kahera ug gikuha ang P46 mil nga halin ug gidaginot usab og dala ang unom ka cellphone sa mga kawani.

Matud pa sa cashier nga si Maricel nga usa sa mga tulisan nga nagsul-ob og t-shirt nga dunay stripes nga orange, duha ka mga lalaking nasigpatan sa kapolisan atol sa hot pursuit operation nga nagsul-ob og susamang sinina ang giimbitahan sa presinto apan wala kini ilha sa mga biktima.

Samtang sa dakbayan sa Talisay, wala pa gihapon mailhi ang duha ka mga lalaking mitulis sa Jevy Money Changer niadtong Sabado sa buntag diha sa barangay Tabunok, dakbayan sa Talisay.

Si PO3 Mikie Espina mibutyag nga nagpatabang na sila sa kapolisan sa dakbayan sa Sugbu pagsusi sa mga tulisan. Ang duha nagpakaaron-ingnong magpailis og dolyares apan human makasulod gitulis ang maong establisamento.

Wala makasukol ang gwardiyang si Anthony Margal human maunhi og tion og kutsilyo samtang ang usa misakiyo sa P150 mil ug usa ka cellphone dayon nagdali sa paggawas ug yanong nanakay og pasaheroan padulong sa dakbayan sa Sugbu.

Si Superintendent Henry Biñas, hepe sa Talisay City Police Station sa pakighinabi niini sa Banat News nagkanayon nga mao pa kini ang unang higayon niining tuiga nga may gitulis nga establisamento sa siyudad. – BANAT NEWS