CEBU, Philippines - Wala hatagi og gibug-aton ni Cebu City Mayor on-leave Tomas Osmeña ang hulga ni Capitol consultant Byron Garcia pagkiha kaniya may kalabutan sa paghulagway sa mayor nga usa ka matang sa extortion ang pagkolekta sa Kapitolyo og terminal fee diha sa South Bus Terminal.
Nagtuo si Osmeña nga walay ordinansang gipalabang ang Hunta Probinsyal nga nagtugot sa nahisgutang matang sa koleksyon.
Ang P5 nga terminal fee nga ipabayad sa mga pasahero ug P100 sa mga minibuses nga mosulod sa terminal gipatuman sa Kapitolyo pinaagi ni Garcia.
Wala makauyon ang capitol consultant sa paghulagway sa mayor hinungdan nga kini nagplanong mopasaka og kasong libelo karong adlawa.
Matud pa ni Osmeña nga wala siya mabalaka niini ug mihagit kang Garcia sa pagtinuod sa hulgang pagpasaka og kaso.
“Bisag kinsa maka-file man og kaso naanad na sila ana, nganong mohatag man ko og importansya niya (Byron)?” sumala pa ni Osmeña. Nagkanayon ang mayor nga wala usab siya masurpresa kung tinud-on sa capitol consultant ang bahad niini uban sa paghatag og mensahe kang Byron. “Sa akong tan-aw naanad na siya sa iyang mga sakop sa provincial jail, mubo ra akong mensahe kang Byron, I’m sorry, I don’t dance no?” matud pa ni Osmeña.
Samtang gidepensahan ni City Administrator Francisco Fernandez ang gihimong paghulagway sa mayor sa pagkolekta og terminal fee sa probinsya.
Matud pa ni Fernandez, walay basihanan ang pagkolekta sa Kapitolyo og terminal fee kung walay napalabang nga ordinansa ang Hunta Probinsyal alang niini.
“Ang maka-set og fees and taxes is the Provincial Board through an ordinance approved by the governor, kung naay ordinansa naa gyud nay public hearing, so, nganong nakalitan man ang mga tawo kung naay public hearing?” nagkanayon si Fernandez. – BANAT NEWS