Bayarcal suportado sa kapolisan

CEBU, Philippines - Subling gisuportahan sa pangulo sa kapulisan ning dakbayan sa Sugbu ang hepe sa traffic division kinsa gihulga nga ipatangtang sa mga abogado nga sakop sa Integrated Bar of the Philippines (IBP)-Cebu City Chapter.

Gisugyot ni Sr. Supt. Patrocinio Comendador nga laing ahensya ang pakupton sa kaso ni Chief Inspector Andres Bayarcal, hepe sa traffic division sa Cebu City Police Office (CCPO) batok kang Atty. Danilo Pilapil.

Ang IBP Cebu City Chapter mipadangat og suwat ngadto kang PNP Chief Jesus Versosa nga ipatangtang si Bayarcal.

Apan matud pa ni Comendador nga nasuta nila nga wala gayu’y kasaypanan si Bayarcal dihang gipapriso niini si Atty. Pilapil.

Samtang ang mga sakop usab sa IBP sa ilang kaugalingong imbestigasyon nagkanayon nga wala gyuy sayop si Atty. Pilapil apan aron walay bias sa isig kahabig, angayang laing ahensya sa gobiyerno ang paimbistigahon.

Gani human masuta sa kapulisan nga walay sala si Bayarcal miduso sila og manifesto nga hugot nga nagsuporta sa naulahi.

Hinuon si PNP Director General Versosa mibutyag sa taga media nga wala pa makig-estorya kaniya ang Presidente sa IBP- Cebu City Chapter nga si Atty. Michael Yu.

Ang kaso ni Bayarcal nanukad dihang gibalhog sa prisohan niini si Pilapil kay namugos nga pagawason gikan sa prisohan ang iyang kliyente nga nakadasmag-patay og tawo.   (Guam P. Logroño)   (BANATNEWS)