Ambulansya nabalitok

CEBU, Philippines - Maayong pagkalukot sa usa ka ambulansya human mabalitok duha ka higayon kagahapon sa buntag dihang gibanggaan sa usa ka taxi diha sa eskina sa dalan Llorente ug Osmeña Boulevard sa barangay Capitol Site ning dakbayan sa Sugbu.

Nakalingkawas hinuon sa tinong kamatayon ang driver sa ambulansya SJN-183 sa Balamban District Hospital nga si Roel Dumdum human gibanggaan sa M & J Taxi nga may plakang GXD-166 ug gimaneho ni Eduardo Bonsocay taga La Guardia, Lahug.

Ang ambulansya maghatud unta og pasyente diha sa Vicente Sotto Memorial Medical Center (VSMMC) sa nabiktima sa pagpamusil sa lungsud sa Balamban.

Si Dumdum nga gikahinabi sa DySS nagkanayon nga kusog ang iyang pagpadagan niadtong higayuna nga naghatud sa pasyenteng napusilan nga si Wilfredo Manriquez, 22.

Apan pag-abot diha sa maong lugar bisan kun go signal kalit lang nibutho ug nidasmag ang taxi hinungdan nga sa ka kusog sa impact nabalitok makaduha ka higayon ang ambulansiya nga nag-atubang balik sa agi nga nagtakilid.

Mga pangos lang hinuon ang iyang naangkon ug gidali og tabang ang iyang pasyente ug ang bantay niini pagdala sa VSMMC. (Guam Logroño)    (BANATNEWS)