Edie Gul: motiwas ko sa termino

CEBU, Philippines - Si Kongresista Eduardo Gullas sa unang distrito sa probinsiya sa Sugbo mihimakak   sa huhongihong nga modagan siya pagka mayor sa dakbayan sa Talisay tungod kay buot niining humanon ang iyang termino ngadto sa Kongreso.

Si Gullas mibutyag ngadto sa mga tigbalita nga daghan pa siyang mga proyektong buhaton alang sa unang distrito hinungdan nga tiwason niya ang iyang katapusang termino ngadto sa Kongreso.

Si Gullas ang miawhag kang Mayor Socrates Fernandez nga mogama og komitiba nga morekomendar ngadto kaniya kun kinsa ang ipuli sa upat ka mga last termer nga konsehal sa siyudad alang sa umaabot nga eleksiyon sa sunod tuig.

Ang mga last termer mao sila si Konsehal Shirley Belleza, Sabeniano Abatayo, Arturo Bas ug Sergio Restauro.

Sa laing bahin, kahinumduman nga ang apo sa kongresista nga si Gerald Anthony “Samsam” Gullas Jr., nagpakita sa iyang ka interesado sa politika diin matud pa niini idolo niya ang iyang apohan nga kongresista. Nagparehistro kini sa barangay Tanke, dakbayan sa Talisay.

Si Samsam gikonsiderar sa grupo sa administrasyon nga usa sa mopuno sa bakanteng pwesto sa konseho sa umaabot nga eleksiyon sa 2010.

Si Gullas mibutyag nga dili siya batok sa pagpakita og interes sa iyang apo ngadto sa pagsulod sa politika apan duna pa kini mga pangutanang angayang tubagon.

“Age wise, he is qualified. I will listen to him and some questions to be asked,” ni Gullas pa. – BANAT NEWS