CEBU, Philippines - Usa ka katabang gipatay ug gisulod sa kabinet sa wala mailhing tawo nga misulod sa usa ka balay sa Veco Road, barangay Banilad, pasado alas 6 sa miaging gabii.
Ang katabang nailhan nga si Carmela Berceno Arnejo, molupyo sa maong dapit ug usa usab ka manindahay og bulak, nakaangkon og binunalan sa iyang ulo nga maoy gituohang hinungdan sa iyang kamatayon.
Matud pa sa amo ni Arnejo nga si Florence Veloso nga sa dihang naabot siya sa balay mipasirbato siya sa iyang sakyanan aron mahibaw-an nga naabot na siya, apan iyang gikatingala nga walay miabli kaniya.
Iyang giatras ang iyang sakyanan ug nangayo og pakitabang sa silingan tungod kay nakabantay siya nga wala magsiga ang suga sa gawas sa balay.
Sa dihang nakapangayo og tabang si Veloso sa ilang silingan nga si Aurelio Baylon, nabantayan nga abli ang kwarto sa katabang hinungdan nga iya kining gisangpit apan walay mitubag.
Mitawag na lang sila og pakitabang sa kapolisan ug daling miresponde silang SPO1 Arnolis Cabales ug PO1 Alfredo Casas sa Mobile Patrol Group (MPG) kinsa mao nay nanulod sa balay ni Veloso.
Atol sa pagsusi sa duha ka polis sa kwarto sa katabang giablihan nila ang kabinet tungod sa pagtuong dunay tawo sa sulod.
Apan nakurat sila human ang patay’ng lawas ni Arnejo maoy misugat sa ilang panan-aw.
Gisulayan pagdala sa V. Gullas Hospital si Arnejo, apan gideklarar kini nga dead on arrival. Sa pakisusi sa panimalay ni Veloso, ilang nakit-an ang usa ka buak nga kaang nga posibleng maoy gigamit pagbunal sa ulo sa katabang.
Matud pa ni PO3 Julius Mabunay sa Homicide Section sa pakighinabi sa Banat News nga posibleng pagpangawat ang tuyo sa mamumuno nga giingong miikyas agi sa luyong bahin sa balay. – BANAT NEWS