CEBU, Philippines - Usa ka babayeng engineer nga nagtrabaho sa Mactan Export Processing Zone ang gilugos ug pagkahuman gitulis diha mismo sulod sa iyang lawak nga giabangan sa usa sa mga barangay sa dakbayan sa Lapulapu kagahapon sa kaadlawon.
Midangop sa kapolisan ug nagpakitabang ang 24-anyos nga dalagang taga Mindanao ug usa sa mga associate engineers sa usa sa mga kompaniya sulod sa MEPZ 1 ug temporaryong nagpuyo sa nahisgutang dakbayan.
Base sa impormasyon nga nakutlo sa Banat News nasayran nga mga alas 3 kagahapon sa kaadlawon gikan sa trabaho ang biktima ug midiretso og sulod sa iyang giabangang lawak.
Sumala pa dihang nag-ilis na og sapot ang dalaga kalit lang migawas gikan sa ilawom sa iyang higdaanan ang wala mailhing lalaki ug diretsong mition kaniya og kutsilyo ug mibahad nga dunay dautang mahitabo kaniya kun mohimo og kasikas.
Gumikan sa kahadlok wala makasinggit pagpangayo og tabang ang dalaga hangtod nga kini gilugos sa maong tawo.
Ang rapist human matagbaw sa iyang lawasnong kahinam ngadto sa biktima wala pa gyud matagbaw gidala usab niini ang laptop, digital camera, cell phone ug kwarta sa dalaga ug nagdali sa paggawas sa lawak ug wala na igkita.
Dihang nakagawas na ang rapist daling gipukaw sa dalaga ang iyang landlord kinsa maoy nanawag og mga barangay tanod aron paggukod sa maong rapist dayon miadto ngadto sa kapolisan.
Apan sa dihang gipangutana ang dalaga sa kapolisan napakyas kini sa pag-ila sa maong responsable sa krimen kay giingong gawas nga wala siya makaila niini mao pa say pagkakita niya sa dagway niini maong nagtuo silang dili molupyo sa ilang lugar ang lalaki.
Sa imbestigasyon sa kapolisan pinaagi ni SPO1 Danilo Aying ug PO3 Elmer Canillo gidudahan nilang posibleng kawat gyud ang tuyo sa maong tawo. Gikatahong miagi kini sa pultahan human nga tangtangi og usa ka jalosy blade sa bintana ug gikuot ang doorknob ug sa dihang nakasulod na gibalik niini og taod ang jalosy blade aron dili mamatikdang dunay nakasulod sa lawak sa biktima.
Subsob karon ang imbestigasyon sa Crime Against Property (TRS) ug Womens and Childrens Desk pagsubay sa gikatahapan. – BANAT NEWS