Coal ash sa Naga di delikado - DENR test

CEBU, Philippines - Migawas sa resulta sa laboratory test sa coal ash samples gikan sa duha ka mga lugar sa Naga sa mga sakop sa Department of Environment and Natural Resources (DENR) nga di kini delikado sa lawas sa tawo ug dili toxic.

Ang maong mga coal ash gikan sa duha ka coal fired power plants sa National Power Corp. (Napocor) nga gidumala sa SPC Power Corp. nga una nang gikabalak-ang dunay mga makamatay nga kemikal ug hazardous metals sumala pa sa pangangkon sa mga environmentalists.

Ang mga environmentalists migamit sa maong rason aron ipanawagan ang pagpahunong sa paghimo sa duha ka modernong coal-fired plants sa KEPCO-SPC Power Corp.

Sumala pa sa gihimong test, ang level sa presensya sa cadmium, lead, ug mercury ubos ra kaayo sa standards sa DENR aron kini ikonsiderar nga toxic base kini sa “Classification of Prescribed Hazardous Wastes.”

Ang coal ash samples gikuha gikan sa pribadong luna nga gipanag-iya sa pamilyang Pansoy kilid sa Naalad River sa barangay Naalad ug sa lote sa mga Abarquez tupad sa Pangdan River sa Barangay Pandan.

Sa pagsusi sa DENR head office duna ray nakitang 0.01 cadmium milligram per liter imbes nga five milligram per liter aron kini tawgong peligroso, samtang mao usab ang nakitang 0.043 milligrams nga lead matag litro nga nagbase gihapon sa lima ka milligrams per liter. Ang lama sa mercury naa lang sa 0.02 milligram per liter.

Base sa maong resulta, ang akusasyong peligroso sa lawas sa tawo ang coal ash diha sa Naga hayan kaduha-duhaan na. Kahinumduman nga tungod sa maong akusasyon nautingkay hasta ang kontrobersyal nga pagkapalit sa Balili Lot sa Tinaan, Naga sa Kapitolyo nga mao untay planong tambakan sa mga coal ash gikan sa planta sa Kepco. - Mitchelle Palaubsanon sa The Freeman (BANAT NEWS)