Kabalayan gibanlas sa balod

CEBU, Philippines - Mikabat ngadto sa 15 ka mga balay ang nabanlas sa dagkong bawod tungod sa kusog nga hangin niadtong Miyerkules sa gabii sa sitio Litmon, barangay Dumlog.

Dili na hinuon kini bag-ong panghitabo sa maong lugar sanglit makadaghang higayon na silang banlason sa dagat kun dautan ang panahon, sa milabay’ng mga buwan mikabat ngadto sa 51 ka mga balay ang nabanlas sa maong dapit.

Si Kapitan Charles Basillote sa Dumlog mibutyag kagahapon nga sobra sa napulo ka pamilyang nagpuyo daplin sa baybayon mibakwit ngadto sa ilang mga paryente ug mga silingan aron makapasilong tungod kay ang ilang mga balay gipangbanlas sa dagkong mga bawod. Ang mga residente diha sa lugar daan nang mibasol sa kagamhanan sa siyudad kabahin sa gitukod nga seawall layo sa kabalayan.

Si Basillote midugang nga ang mga pamilyang ulahing naapektohan ang miuyon nga mobalhin gikan sa ilang gipuy-an karon apan ang problema kay ang relocation site diha sa sitio Romahan, Dumlog okupado na kini. - Brenda Batuto (BANAT NEWS)