Illegal loggers naaktuhan

CEBU, Philippines - Nagtingkagol sa Talisay City Police stockade ang duha ka mga lalaki human sila masakping namutol og mga kahoy nga Gemilina ug Mahogany nga naatlan sa nagpatrolyang polis, opisyales sa barangay ug mga sakop sa Forest Guardian niadtong Miyerkules sa buntag sa sitio Campinsa, barangay Manipis, dakbayan sa Talisay. Mokabat sa 1,013.36 board feet ang maong kahoy nga nagkantidad og P2 mil. Ang mga suspetsado mao ang magsuong Randy, 24, ug Joel Prajes, 21, pulos taga barangay Camp 7, Minglanilla. Ang mga nasakmit nga kahoy gihatud na ngadto sa Department of Environment and Natural Resources (DENR). Nasakmit usab sa mga polis ang duha ka sundang nga gigamit sa pagpamutol sa kahoy. Ang operasyon gihimo tungod sa mga reklamo kabahin sa padayong pagpamutol sa mga kakahuyan sa maong lugar. - Brenda Batuto (BANAT NEWS)