Bukton nalahap sa sundang

CEBU, Philippines - Nalahap ang bukton sa usa ka lalaki human kini tigbasa sa kapuyo sa iyang uyab diha sa JY dela Cerna St. sa barangay Poblacion dakbayan sa Lapulapu sa milabay’ng gabii. Ang biktima giilang si Eliezer Villapania, 22, nagpuyo sa sitio Sea Breeze sa Pusok dakbayan sa Lapulapu. Sa imbestigasyon ni SPO1 Honorato Inihaw nasutang ang magsuong Kerwin Aranario, 30, ug Alexander, 35, maoy responsable sa maong krimen. Usa ka Mitchel Ladao maoy kanhing kapuyo ni Kerwin sulod na sa tulo ka tuig ug gani duna na silay mga anak maoy uyab ni Villapania sulod na sa usa ka semana. Gikatahong nag-abot ang magsuon ug ang biktima ug nagkakomprontase hangtud nga misangpot kini sa pagkulata sa duha ngadto sa biktima ug natigbasan kini ni Kerwin. Si Villapania nga nahiwa ang walang bukton gidala sa Lapulapu City Hospital samtang ang magsuong Aranario nangikyas. - Bong Soriano (BANAT NEWS)