CEBU, Philippines - Giangkon sa Provincial Comelec officer nga maglisod sila og tangtang sa mga pangalan sa mga patay nang botante diha sa voters list kun walay certification gikan sa Local Civil Registrar nga nagmatuod nga patay na ang maong botante.
Matud ni Atty. Lionel Marco Castillano nga gikinahanglan usab ang approval gikan sa election registration board una pa kini tangtangon ang pangalan sa usa ka patay nga botante gikan sa voters list.
Apan nagkanayon hinuon siya nga panahon sa botasyon gikinahanglan magbantay gyud ang mga watchers sa isig ka mga kandidato aron ila dayong makurihian kung makabantay sila nga dunay botante nga migamit sa pangalan sa usa ka patay.
Pipila sa mga kandidato kaniadto ilabi na niadtong mga naparot sa milabay’ng mga piniliay mipasangil sa ilang mga kaatbang nga hasta ang mga patay na nakabotar gihapon pabor sa ilang mga kaatbang.
Samtang gipahibalo usab niini nga gilugwayan og duha ka oras ang pagpangrehistro sa mga bag-ong botante subay sa memorandum gikan sa Comelec Central Office, ang registration sugdan sa alas 8:00 sa buntag ug hangtud na kini sa alas 7:00 sa gabii gikan sa Lunes hangtud sa adlaw’ng Sabado.
Kini aron mahatagan og kahigayonan kadtong mga trabahante sa pribado ug publikong buhatan nga makaparehistro kutob nalang karong kataposan niining bulana.
Gipahibawo usab ni Castillano nga sunod semana mopahigayon og site survey ang Comelec ug Smartmatic sa tanang polling stations sa nasud lakip na dinhi sa Sugbo.
Matud niya nga ang katuyoan niini mao ang pagsusi kung duna bay signal sa cellphone ang mga polling stations sanglit importante kaayong dunay signal o ba kaha linya sa telepono ang usa ka polling precincts aron magamit ang automated machine atol sa eleksiyon sunod tuig, kadtong mga dapit nga walay signal o linya sa telepono butangan kini og satellite phone aron madali ang transmittal sa mga botos. – BANAT NEWS