Payag sa nananom og marijuana naugdaw

CEBU, Philippines - Payag sa giingong suspetsadong nananom og mga marijuana ang naugdaw dihang ang mga sakop sa Philippine Drug Enforcement Agency (PDEA)-7 uban sa Bravo Company sa 78th Infantry Battalion mipahigayon og operasyon niadtong Domingo sa buntag sa barangay Basak, lungsod sa Badian.

Si Intelligence Officer 3 Mark Maramba sa PDEA-7 ug 1st Lieutenant Lorenzo Siobal ang nangulo sa operasyon batok sa marijuana plantation ug naabot sila sa lugar mga alas 5:30 sa buntag human sa upat ka oras nga pagbaktas.

Dihang nakita sa operatiba ang usa ka payag nagpaila silang mga sakop sa PDEA sa tawo diha sa sulod diin ang maong tawo ang gidudahang maoy nananom sa mga marijuana.

Ang maong tawo ang nagluto alang sa pamahaw niini diha sulod sa payag ug midagan paingon ngadto sa kalibunan sa pagkahibawo nga mga otoridad ang mga grupong miabot sa lugar.

Si Maramba nagkanayon nga aksidenteng nadasmagan sa maong tawo ang nagsiga nga hinaling ug mitugpa kini didto sa mga dagami sa mais nga maoy hinungdan sa pagkasunog sa payag niini.

Ang PDEA ug ang 78th IB ang nakalarot og 1,365 ka mga punoan sa marijuana sa lugar diin ang ilang gidala 448 lang ka punoan isip ebidensiya ug ang 917 ilaha na lang kining gisunog. (BANATNEWS)