Mag-uuma gihatagan og hose ug drum

CEBU, Philippines - Gihatag na sa kagamhanan sa dakbayan sa Sugbu ang taud-taod nang gipangayo sa mga mag-uuma sa bukirang mga barangay sa siyudad nga mga hose ug plastic drum nga magamit sa ilang inadlaw-adlaw nga pagkuha og tubig gikan sa ilang tagsa-tagsa ka mga tinubdan.

Ang ceremonial turn-over sa maong mga kagamitan nga nagkantidad og P5 milyones gipahigayon kagahapong adlawa diha sa Cebu City Hall.

Si acting mayor Michael Rama uban sa pipila ka mga konsehal sa siyudad maoy mitugyan sa mga hose ug drum ngadto sa kabarangayan.

Malaumon ang acting mayor nga mulambo pa ang abot sa mga mag-uuma pinaagi sa gihatag nga hose ug drum sa City government niini. Matud ni City Agriculturist Joelito Baclayon nga ang 28 ka bukirang mga barangay sa siyudad maoy makapahimulos sa nahisgutang mga butang.

Midugang si Baclayon nga lakip usab sa mahatagan niini mao ang 18 ka farmer’s association ug kooperatiba sa bukirang mga barangay sa dakbayan.

15 ngadto sa 30 ka mga hose ang iapod-apod ngadto sa matag barangay ug sa mga organisasyon, uban sa pipila ka mga plastic drum nga mosulod og tag-200 litros.