Nakapatay'g asawa misuway'g hikog

CEBU, Philippines - Misuway sa pagpakamatay sulod sa Moalboal Police Station niadtong Martes sa hapon ang usa ka bana human miangkong iyang aksidenting napusilan patay iyang asawa niadtong Domingo sa gabii didto sa ilang panimalay sa Sitio Tiguib barangay Buguil.

Kini maoy gikonpirmar ni PO3 Remberto Empeynado sa Moalboal Police Station dihang gikahinabi sa Banat News human ang suspek nga si Reneboy Rezonable, mag-uuma, bulontaryong mitahan sa ilang buhatan.

Si PO3 Empeynado, nagkanayon nga naghigot na og pisi sa iyang liog si Rezonable sulod sa selda sa Moalboal Police Station niadtong Martes sa alas 3:45 sa hapon ginamit ang pisi nga hayhayan sa ilang mga sinina.

Matud pa niya nga nakurat nalang ang ilang mga kaubanang polis nga mi-duty niadtong higayona dihang ang kaubanang piniriso sa suspetsado nga si Eric Saac kalit nga misinggit nga nangayog panabang.

Dihang gisusi sa mga polis sulod sa selda naabtan nila si Rezonable nga nagkirig-kirig na niadtong higayona nga nagbay-ad sa baldosang sementado apan wala matiwas.

Hinuon bisan pa kun milagom na kini, natabang pa gayud sa kapulisan ug gidala kini sa tambalanan ug anaa na karon sa luwas nga kahimtang nga gitanggong pagbalik sa selda.

Ang suspek miingon nga nakonsensya siya sa kamatayon sa iyang asawa nga si Thelma Rezonable, 36, human kini maigo sa bala sa iyang Ingram nga aksidenteng mibuto samtang iyang gilimpiyohan.

Una siyang mitahan ngadto ni kapitan Sabeno Infante sa ilang barangay nga uyoan usab sa iyang asawa kinsa maoy mihatod kaniya ngadto sa kapulisan.

Gi-surender usab sa suspek ang iyang Ingram nga dunay unom ka buhing bala, usa ka basiyo sulod sa magazine niini ug gipa-ubos na karon sa iksaminasyon sa PNP-Crime Laboratory.   (BANATNEWS)