CEBU, Philippines - Andam mopadala pag-usab og tropa ang Cebu Provincial Police Office (CPPO) ngadto sa lungsod sa Tudela, isla sa Camotes ang Korte Suprema mipabor ni kanhi Mayor Demetrio Granada nga maoy midaog sa nilabay’ng piniliay batok ni Mayor Rogelio Bacquerfo.
Si Sr. Supt. Jesus Gaquing, direktor sa kapolisan sa lalawigan sa Sugbu nagkanayon nga andam silang mopadala’g dugang pwersa sa Special Reaction Units (SRU) kun dunay hulga sa kahusay sa nahisgutang lungsod.
Matud pa ni Gaquing nga sama kaniadto nagpaabot sila sa kamanduan sa Commission on Election (COMELEC) kun mopadangat kini kanila’g komunikasyon sa pag-install unya kang Granada.
Apan hangtud wala sila'y madawat nga komunikasyon gikan sa Comelec ang ilang tropa pabiling mag-estambay lang una sa ilang headquarters sa CPPO, samtang wala pa usab silay nadawat nga report nga dunay kagubot tali sa mga supporters ni Baquerfo ug Granada.
Subay niini, iyang gimanduan si Insp. Wilfredo Gedocos, hepe sa Tudela Police Station nga mopadangat og komunikasyon ngadto kang Granada ug Baquerfo aron ilang ma-estoryahan ang ilang mga sakop. (BANATNEWS)