CEBU, Philippines - Gikatakdang ipadala karong adlawa didto sa kaulohan ang mga sinako nga relief goods alang sa mga biktima sa bagyong Ondoy.
Ang maong mga relief goods bunga sa gilusad nga kampanya sa The Freeman ug Banat News, inabagan sa University of the Visayas ug The Freeman Foundation, aron itabang ngadto sa libuan ka mga apektado sa bagyo sa Metro Manila. Kini pinaagi sa pakigtambayayong sa Operation Damayan sa The Philippine Star Group of Publications.
Gawas sa sinako nga relief goods, nakahipos usab ang The Freeman ug Banat News og kuwarta nga mikabat og P29,355 nga naggikan sa mga empleyado sa duha ka mantalaan, mga magbabasa ug mga kompaniya.
Ang general manager sa The Freeman ug Banat News nga si Melandro Mendoza maoy nangulo kagahapon sa pagpamutos sa relief goods.
Inig-abot sa kaulohan, ang Operation Damayan maoy gitahasan nga mo-apod-apod sa hinabang alang sa mga biktima sa nahitabong kalamidad dili pa lang dugay. (BANATNEWS)