'Balili' Mandaue version

CEBU, Philippines - Duha ka mga dagkong “bomba” ang gipabuto ni Bise Mayor Carlo Pontico Fortuna batok sa kagamhanan sa dakbayan sa Mandaue kagahapon, una mao ang napakgang nga lakang sa pagpalit sa P195 milyones nga yuta sa barangay Paknaan nga gilibutan og tubig-dagat ug ikaduha mao ang pagpamalit og mga luhong sakyanan nga walay pagtugot sa Malacañang.

Si Bise Mayor Carlo Pontico Fortuna mitubag sa pamahayag sa opisyal sa Mandaue City Hall nga walay kaluoy ang konseho tungod sa pagbasura niini sa memorandum of agreement (MOA) tali ni Mayor Jonas Cortes ug tag-iya sa yuta nga si Dennis Lua. Ang yuta giplanohang himuong relocation site sa mga squatters nga nagpuyo sa mga lugar nga kuyaw kun may kalamidad.

Si Fortuna nagkanayon nga napugos sila pagbakwi sa katungod nga gihatag sa konseho ngadto ni Cortes human masuta nga ang unom ka ektaryang luna usa ka “foreshore lot” apan na-classify isip fishpond ug adunay “adverse claim.”

Ang maong yuta, sumala pa sa bise mayor, naglubog sa tubig-dagat ug matabonan og dagat panahon sa taob. Milabang na usab kini sa Butuanon river.

Giangkon niini nga ang konseho maoy naghatag ni Cortes og gahum pagpakigsabot tali sa tag-iya sa yuta nga si Lua aron kabalhinan sa mga ma-demolish nga squatters.

Apan wala magdahum ang konseho sa kahimtang sa maong yuta hinungdan nga dali kini nilang gibakwi aron malikay sa kontrobersiya sama sa nahitabo sa yuta sa mga Balili sa Tinaan, Naga. Sumala pa ni Fortuna nga usa ka pagpanglingla sa konseho ang transaksiyon nga sudlan unta ni Cortes nga magbutang sa dakong alkanse sa siyudad sa Mandaue kun mahinayon pagpabayad sa P195 milyones ni Lua.

Kahinumduman nga sa dihang gibakwi sa konseho sa dakbayan sa Mandaue ang katungod ni Cortes pagsulod sa usa ka kontrata, si Atty. Francisco Amit, ang Housing and Urban Development Officer sa Mandaue mihulagway sa mga sakop sa konseho nga walay kalooy ngadto sa mga residente nga mabiktima sa demolisyon kay gihikawan kini sa pag-angkon og relocation site nga sarang ilang kapuy-an.

Sa laing bahin, giandam ni Fortuna ang kaso nga malversation of public funds batok kang Cortes tungod sa pagpamalit og mga luhong sakyanan nga nagkantidad og P6.6 milyones.

Gialegar ni Fortuna nga wala masubay sa legal nga proseso ang pagpamalit og mga luhong sakyanan nga naglakip sa usa ka Toyota Grandia, usa ka Nissan Urvan Escapade, ug upat ka Isuzu Crosswind nga ang pipila maoy gigamit sa tourism office ug mga kaalyado niining sakop sa konseho.

Dugang pa ni Fortuna nga walay pagtugot sa Office of the President ang pagpamalit sa maong mga sakyanan nga maoy hinungdan nga gi-disallow kini sa Commission on Audit.

Sa Audit Observation Memorandum ni COA state auditor Nancy Aparri nga gipadala ngadto ni Cortes, kini nagkanayon nga usa ka “irregular disbursement of public funds” ang pagpamalit sa mayor og mga luhong sakyanan nga walay pagtugot sa Office of the President.

Si Amit sa iyang bahin nakapangutana kang Fortuna kun unsay kasuko niya kang Gob. Gwendolyn Garcia nga gidala ang “Balili isyu” sa Mandaue.

Si City Administrator Briccio Boholst sa pakighinabi sa The Freeman nagkanayon nga andam silang mohimo og ocular inspection sa yuta ni Lua aron masuta sa mga sakop sa konseho nga 500 metro kuwadrado lamang ang naglubog sa tubig ug dili tinuod nga mitabok na kini sa Butuanon river.

Matud niya nga tuyo lamang ni Cortes nga matubag ang problema sa kapuy-an sa mga squatter sa dakbayan.   (BANATNEWS)