Baquerfo di manaog sa pwesto

CEBU, Philippines - Si Mayor Rogelio Baquerfo sa lungsod sa Tudela, sa isla sa Camotes mibahad kagahapon nga dili gyud siya manaog sa katungdanan bisan og miluwat na og desisyon ang Commission on Elections (COMELEC) Manila nga nag-afirmar sa hukom sa korte sa Danao City nga nagproklamar kang Mayor Demetrio Granada nga maoy mananaog sa miaging piniliay.

 Sa interview sa DyRF, si Baquerfo nagkanayon nga wala siya masayod sa maong desisyon sa COMELEC.

 Matud pa ni Mayor Baquerfo nga dugay nang gipadangat sa iyang abogado ang maong kaso ngadto sa Korte Suprema ug gani mipabor kaniya ang desisyon sa labaw’ng hukmanan.

 Kini ang iyang basehanan nga dili gyud siya manaog sa iyang katungdanan kay siya ang tinuoray nga nakadaug sa pagka-mayor sa Tudela.

 Dugang pa ni Baquerfo nga moduol siya pag-usab sa Korte Suprema sa higayon nga ipamugos sa COMELEC ang pagpatuman sa desisyon niini.

 Nasayran nga napugos sa pagkanaug si Granada sa pagkamayor sa naasoy nga lungsod human ipatuman sa COMELEC en banc ang desisyon pagpalingkod kang Baquerfo sa katungdanan.

Kini human mapakyas si Granada sa pagkuha sa writ of execution order aron ipatuman ang desisyon sa korte sa Danao City.

 Samtang gitumbok ni Provincial Election Supervisor, Atty. Lionel Castillano nga dili madalidali sa pagpahawa sa iyang katungdanan si Mayor Baquerfo.

 Kini bisan pa kun ang COMELEC Manila may desisyon nga naglig-on sa hukom sa korte sa Danao City nga nagproklamar kang Granada nga maoy mananaog.

 Matud pa ni Castillano nga si Baquerfo makahimo pa sa pagduso og motion for reconsideration   sa maong desisyon sa COMELEC en banc.

 Giklaro hinuon ni Castillano nga mahimong makalingkod si Granada kun makakuha kini og writ of execution order gikan sa COMELEC Manila.

 Samtang gitataw niya nga ang kaso ni Baquerfo nakadangat na sa Korte Suprema nga maoy hinungdang giluwatan kini og Temporary Restraining Order (TRO).   (BANATNEWS)