CEBU, Philippines - Konseho sa barangay Linao ang miawhag sa pamilyang Carbonil kinsa nangangkon nga naapil ang ilang yuta sa usa sa mga karsada diha sa lugar nga mopahigayon og re-survey sa maong luna.
Ang maong karsada ang gisunod sa pangalan ni Jose G. Logarta diin niadtong Septiyembre 26, 2009 atol sa kataposang adlaw sa pagsaulog sa 15th Press Freedom Week gipahigayon ang unveiling niini sa pagpasidungog sa maong sakop sa media nga Talisaynon.
Kahinumduman nga si Mary Jocelyn Carbonil ang nakakuha niadto og atensiyon sa mga nanambong sa unveiling dihang nagbagolbol kini nga ang 110 metro kwadrado nilang luna (gilapdon ug gitas-on) ang naapil sa maong karsada ug gani miduol siya sa mga opisyal sa barangay apan giawhag siya nga ipaubos sa pormal nga paagi ang iyang reklamo.
Si Konsehal Val Ylanan sa Linao sa pakighinabi niini sa Banat News kagahapon nagkanayon nga giimbitar nila ang pamilyang Carbonil nga motambong sa ilang session aron matuki ang maong problema.
Matud ni Ylanan nga niadtong Sabado mitungha si Agnes Carbonil, igsoon ni Mary Jocelyn ug nagdala kini og sketch plan apan ang maong plano dili pa aprobado sa bureau of land.
Ang konseho sa barangay miawhag sa mga Carbonil aron sa pagmatuod sa ilang pangangkon kinahanglan nga ipa-resurvey nila ang luna.
Si Ylanan nagkanayon nga kung mapamatud-an nga ang barangay nakalapas sa luna sa mga Carbonil posibleng ilahang i-irog ang karsada o ba kaha mohangyo sila sa siyudad nga bayaran na lang kini. (Brenda D. Batuto) (BANATNEWS)