CEBU, Philippines - Gihulmigas nang nakit-an daplin sa dalan ang patay’ng lawas sa usa ka lalaki sa barangay Dakit, lungsod sa Bogo kagahapon sa alas 10:30 sa buntag.
Patay nang nakit-an si Felipe Ngujo Aradia, ulitawo ug molupyo sa nahisgutang lugar. Si PO2 Joseph Salvador, imbestigador sa Bogo Police Station sa dihang nahinabi sa Banat News, nagkanayon nga si Aradia namatikdan sa mga silingan nga hubog kaayo nianang pagka-gabii ug hangtod sa pagkakaadlawon.
Namatikdan pa si Aradia nga nianang pagkabuntag nagpangayo pa kini og inom hangtod nga namatikdan na lang kining naluya ug mihigda daplin sa dalan.
Ang mga silingan nga nagduda sa kahimtang ni Aradia daling mipahibalo sa kapolisan ug miresponde dayon kauban ang medical officer nga si Dra. Minerva Millor ug pag-abot sa lugar patay na ang biktima.
Nasuta pa nga gihulmigas na ang baba ni Aradia ug sa gihimong pakisusi ni Dr. Millor dunay myocardial infarction kon susama sa atake sa kasingkasing ang gikamatyan sa biktima. (BANATNEWS)