CEBU, Philippines - Ang pangulo sa kapulisan sa dakbayan sa Sugbu Sr. Supt. Patrocinio Comendador miawhag kang Christine Solante, pagdusog dokumentong magpamatuod nga nawad-an kini’g P300 mil atol sa pagsuhid sa mga sakop sa Fuente Police Station ug sa Mobile Patrol Group (MPG) sa iyang panimalay niadtong milabay’ng semana.
Kini subay sa lakang ni Christine pagsang-at og kaso batok ni PO2 Marvin Sanson, SPO2 Rene Sultan, PO2 Clifford Mantua nga maoy misulod ug nangrekisa sa panimalay sa maong babaye nga walay search warrant apan giingong ‘with consent’ sa tagbalay sa pangangkon pa sa maong mga polis.
Si Comendador mipahibalo nga makaduha na ka higayong iyang gipatawag aron klaruhon ang pasangil pagpanguha’g kwarta sa iyang mga sakop.
Kun masuta sa imbestigasyon nga sad-an si Sanson dili siya magmakuli pagpatuman sa pagpahamtang sa bug-at nga silot pagpatangtang niini sa serbisyo.
Hinuon nagpadayon ang ilang fact finding investigation kabahin sa maong pasangil ug ang resulta iyang iduso ngadto kang PRO-7 Chief Supt. Lani-O Nerez. Kagahapon gisang-at na ang kasong robbery batok sa maong mga polis sa magtiayong Solante.
Gikwestyon ni Comendador nganong nadala sa maong ginang ang armas nga iya sa gobiyerno nga gihuptan ni PO3 Reynaldo Solante, apan ang naulahi nagkanayon nang daan nga depektoso ang maong armas ug diha gihipos sa sakyanan tungod kay walay kabinlan niini sa ilang opisina sa CPPO.
Samtang si Sr. Supt. Jesus Gaquing, director sa kapulisan sa lalawigan sa Sugbu nipadayag nga gitahod nila ang katungod sa asawa ni PO3 Solante nga si Christine ug wala na sila’y mahimo kun mosang-at gyud og reklamo.
Hinuon bisan sa maong kontrobersiya wala kini makaapekto sa relasyon sa kapulisan sa dakbayan ug sa lalawigan sa Sugbu. (Guam Logroño) (BANATNEWS)