Mini-bus operators vs Byron

CEBU, Philippines - Mideklarar na og gubat ang presidente sa Cebu South Mini-Bus Operators Association batok consultant on security sa Kapitolyo nga si Byron Garcia.

Kini human usab hinginli ni Garcia ang mga mini-bus diha sa South Bus Terminal nga nagdumili pagsunod sa gipatuman niining patakaran sa South Bus Terminal.

Giluwatan ni Julito Flores ang deklarasyon atol sa pagduaw niini uban sa pipila sa iyang mga sakop ngadto sa buhatan ni Konsehal Sylvan Jakosalem kagahapong adlawa.

Matud ni Flores nga dili nila madawat ang palisiya ni Garcia nga pugson pagpasulod ang mga mini-bus ingon man ang mga pasahero diha sa nahisgutang terminal.

Nagdumili ang ubang mini-bus ingon man ang mga pasahero pagsulod sa terminal tungod sa bayranan. Ang matag mini-bus paninglan og P100 matag sulod sa terminal ug tag-P5 usab ang terminal fee sa matag pasahero.

Gusto sa mga mini-bus operator nga kahatagan og alternatibong terminal, alternatibong rota o temporaryong bus stop nga ilang kapanaugan ug kapasakyan sa mga pasahero.

Gipadayag ni Flores nga naalkanse na ang mga drayber sa ilang kita sa pagpamasahero tungod sa bag-ong palisiya sa terminal nga ilang gituohan nga iya ra kang Garcia.

Si Garcia sa iyang bahin mipakagamay sa reklamo ni Flores.

Sumala pa ni Garcia nga wala siya'y gipatuman nga palisiya sa terminal gawas lang sa P5 nga terminal fee sa mga pasahero.

Matud niya nga personal nga kabubut-on ni Flores ang iyang reklamo ug dili siya motuo nga suportado kini sa kinabag-ang mini-bus operators.

Namatikdan ni Garcia nga ang Chan Transit nga adunay 20 ka yunit padayong nag-parking sa terminal.

Gibutyag ni Garcia nga naglagot kaniya si Flores tungod sa pagbalibad niya sa hangyo niining butangan og kaugalingong parking bay ang iyang mga yunit sulod sa terminal.

Gipaminaw hinuon ni Jakosalem ang yangungo sa grupo ni Flores ug mipasalig pagtuki niini atol sa sinemanang tigom sa Citom.

Una nang gipadayag sa konsehal nga ang mga pasahero mismo maoy mireklamo sa Citom human ipatuman ang bag-ong patakaran sa South Bus Terminal.

Gipasalig ni Jakosalem nga ilang pangitaan og paagi nga dili magkalisod-lisod ang mga pasahero ug dili usab masakripisyo ang dagan sa trapiko diha sa Natalio Bacalso Avenue.

Labaw sa tanan, wala'y malapas nga traffic ordinance sa dakbayan subay sa ipatuman unya nga kausaban nunot sa reklamo sa mga pasahero ug sa mga mini-bus operator.

Sa kasamtangan, dunay gibutang nga experimental bus stop ang Citom sa atbang sa nahisgutang terminal samtang tun-an pa ang hangyo sa grupo ni Flores. (BANATNEWS)