Talisay malinawon kaayo karon

CEBU, Philippines - Ang kapolisan sa dakbayan sa Talisay wala pay nasugatang mga insidente atol sa mga kalihokan nga gipahigayon alang sa umaabot nga piyesta sa siyudad sukad niadtong Huwebes.

Karong Oktubre 15, 2009 ang siyudad magsaulog sa kapistahan ni Santa Teresita de Avila diin ipahigayon usab ang parade sa Halad Inasal

Festival. Niadtong Huwebes gipahigayon ang opening salvo alang sa piyesta diin adunay gipahigayong prosesyon sa imahen sa patrona sa dakbayan.

Si Superintendent Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga sukad niadtong Huwebes walay mga insidente o mga dautang hitabo nga ilang nasugatan. Kasagaran sa mga kalingawan anha ipahigayon sa sports complex sa barangay Poblacion apan gumikan sa kadaghang tumatan-aw niini maghuot ang katawhan sa gawas sa maong sports complex.

Si Biñas nagkanayon nga usa sa iyang gikabalak-an mao ang stampede tungod sa kahuot sa maong lugar matag higayon nga adunay mga kalingawan.

Kabahin sa pagmintinar sa kahapsay ug kalinaw, gidestinohan gyud niya og mga polis ang palibot niini gawas sa mga check points nga gipahigayon sa nagkalainlaing lugar sa dakbayan. – BANAT NEWS