Sunog sa Opao, Mandaue gituyo?

CEBU, Philippines - Gisubay karon sa mga bombero sa dakbayan sa Mandaue ang giingong panag-away sa managsilingan nga maoy posibleng hinungdan sa nahitabong sunog sa sitio Villa Mangga, barangay Opao, dakbayan sa Mandaue niadtong miaging semana nga mikalas sa kinabuhi sa usa ka babaye nga napaig uban sa pagkaugdaw usab sa iyang panimalay.

Si Chief Inspector Oscar Mayol sa Bureau of Fire Protection (BFP) sa dakbayan mibutyag sa Banat News  nga padayon pa sila sa paghipos og mga ebidensiya aron pagsuta sa tinuod nga nagpaluyo sa kalit kaayong pag-ulbo sa kayo.

Gipasabot ni Mayol nga ang anggulo nga arson maoy ilang gisil-ing karon human mosibaw ang mga tabi-tabi nga may duha ka managsilingan sa maong dapit ang nagkaaway ug nagbinaharay nga dauban ang ilang lugar. 

Hinuon miingon si Mayol nga gisusi usab nila ang bahin sa faulty electrical wiring nga hinungdan.

Sa pagkakaron padayon pang nangapkap og dugang kasayoran ang mga bombero sa Mandaue aron taralon sa hukmanan kun mamatud-ang may mga tawong mituyo pagduslib sa ilang lugar aron mangaugdaw ang kabalayan sa mga molupyo sa maong dapit. – BANAT NEWS