Apprentice gihagbong sa barko

CEBU, Philippines - Ang marine engineering apprentice nga si James Jadraque, 19, ulitawo, taga El Salvador, Landing, Lanao del Norte, nakit-an na lang nga patay sa barkong iyang gi-aprentisan nga mao ang M/V Queen Faith nga gibaradero sa PKS Shipyard sa Sitio Tawagan, barangay Tayud, Consolacion kagahapon sa alas 10:15 sa buntag.

Si PO3 Ramir Maglasang sa Consolacion Police Station nagkanayon nga ang second engineer sa barko nga si Lorido Benson, 47, taga Santander, Cebu maoy nakakita sa biktima nga nagbuy-od na sa bodega nga wala nay kinabuhi.

Matud pa ni PO3 Maglasang nga niadto pang alas 8 sa milabay’ng gabii gipangita sa iyang mga kaubanan si Jadraque human usab kini nahanaw.

Si Benson miingon nga gikakurat nila ang pagkakaplag ni Jadraque nga patay na.

Sumala pa sa kapolisan nga gialegar sa mga kauban nga nahagbong si Jadraque sa dili mominos 40 ka tiil ang gihabugon sa bodega sa barko nga gibaradero. Apan nagtuo ang kapolisan nga adunay foul play ang kamatayon sa apprentice tungod sa nakitang lagom sa duha ka bukton ingon man sa liog niini samtang walay dugo sa mismong lugar nga nahagbongan.

“Kadudahan gyud kaayo kay kun 40 ka tiil ang gilawmon sa hagbungan sa usa ka tawo mabali-bali gyud ug dunay dugo nga makita pero kini lahi man wala gyo'y dugo gawas lang sa gagmay’ng lagom sa duha ka buktom ug liog hinungdan nga nagpatabang sila sa Scene of the Crime Office (SOCO),” sumala pa ni PO3 Maglasang.

Ang lawas ni Jadraque walay mga samad ug balibali sa kabukogan nga mugna sa iyang pagkahagbong.

Sumala pa sa mga imbestigador nga dili mo-inom si Jadraque tungod sa relihiyon niini.

Matud hinuon ni PO3 Maglasang nga gisusi karon ang anggulo nga panag-away.

Sutaon sa kapolisan kun aduna bay gikaaway nga kauban si Jadraque. – BANAT NEWS