Radaza magkongresista

CEBU, Philippines - Aprobado na ang usa ka resolusyon sa barangay Looc, dakbayan sa Lapulapu nga nagduso kang Lapulapu City Mayor Arturo Radaza nga magkongresista sa Lapulapu ug ni Mactan Brgy. Capt. Paz Radaza sa pagka mayor sa maong dakbayan sa umaabot nga piniliay sa tuig 2010 ug gihandos na ang maong resolusyon ngadto sa konseho sa maong dakbayan.

 Matud pa ni Lapulapu City Vice Mayor Mario Amores nga tayming kaayo ang pagduso sa maong resolution sa taga Looc kay bag-o pang giaprobahan sa Senado ang Senate Bill 5007 nga naghimo sa dakbayan sa Lapulapu nga usa ka distrito.

Ang maong kalambuan gikalipay usab ni ABC President Leo Mercado gumikan kay iyang mapanglantawan nga kun magkongresista si Radaza ug mahimong mayor usab ang iyang asawa, hayan nga magbaha ang tanang mga proyekto sa maong lugar ug makabenipisyo niini ang tanang nagpuyo sa maong dakbayan. (Bong Soriano)   .   (BANATNEWS)