Mandaue may P1 milyon para biktima sa Ondoy
CEBU, Philippines - Nagtinguha ang kagamhanan sa dakbayan sa Mandaue sa paghatag og hinabang nga nagkantidad og P1 milyon nga salapi alang sa mga biktima sa baha didto sa National Capital Region.
Si Konsehal Emiliano Rosal kinsa maoy chairman sa committee on budget and appropriation maoy nangamahan sa resolusyon nga ilang giaprobahan sa regular session niadtong miaging adlaw.
Ang resolusyon maoy nagtugot kang Mayor Jonas Cortes sa pagpagawas sa maong kantidad aron ihinabang sa nabiktima sa bagyong Ondoy sa kaulohan.
Samtang si Provincial Board Member Agnes Magpale atol sa Tapok-Tapok sa Kia Forum niadtong miaging adlaw miingon nga mokabat usab sa P10 milyones ang ilang gigahin nga salapi gikan sa panudlanan sa kagamhanan sa lalawigan sa mao gihapong katuyoan.
Dugang pa niya nga pinaagi sa usa ka resolusyon nga ilang giaprobahan, gitugotan nila si Gobernador Gwendolyn Garcia sa paghatag sa maong kantidad ngadto sa nahisgutang mga biktima.
Sa laing bahin si Kongresista Rozzano Rufino Biazon kinsa dinhi sa Sugbo niadtong miaging adlaw miingon nga sa ilang dapit sa dakbayan sa Muntinlupa lakip usab nga nakasinati og grabeng kadaut gumikan sa bagyong Ondoy.
Matud pa niya nga gawas sa brownout, nasinatian usab nila ang kawalay tubig nga mainom. (Rimeo T. Limpangog) . (BANATNEWS)
- Latest
- Trending
