CEBU, Philippines - Usa ka lahi nga selebrasyon nga gisaulog sa Isla sa San Miguel, Sitio Kabakongan, Barangay Japitan, Barili niadtong Septembre 29, 2009.
Kini mao ang pagsaulog sa piyesta sa San Miguel nga gidagsang sa mga molupyo sa maong dapit uban sa ilang mga kabataan.
Matud ni Azucena “Baby” Pace, iyang gisugdan ang pagsaulog sa piyesta ni San Miguel kapin na sa lima ka tuig ang nakalabay human matukod niya ang edipisyo ug ang parola.
Matud niya nga nakuha niya ang inspirasyon human niya makita ang Mont St. Michael didto sa Brittany, France ug ang Saint Michael’s Mount didto sa Cornwall, England.
Kining mga dapita mga “pilgrimage sites” giliyokan sa mga tubig dagat kung high tide , mao nga magsakay og baroto ang mga bisita, apan maglakaw kung low tide.
Kasagaran dagsaon ang maong mga dapit panahon sa hunas ug magdali pagbalik nga dili maabtan sa taob.
Ang Isla sa San Miguel susama usab ang pagkabutang nga giliyokan sa tubig dagat panahon sa taob.
Ang lighthouse o parola niini maoy nakalipay karon sa mga mananagat kay nahimo nalang sayon ang ilang pagpauli panahon sa kangitngit gikan sa lawod.
Bisag dili San Miguel ang patron sa maong dapit , nahimo na kining tinuig nga selebrasyon sa maong dapit sa among lungsod sa Barili.
Si Azucena Baby Pace aduna usab siya’y private museum sa iyang residencia sa among lungsod gawas nga opisyal usab kini siya sa Heritage committee sa St. Anne Shrine museum. (PR) . (BANATNEWS)