50 inmates dad-on Munti'

CEBU, Philippines - Laing 50 ka mga insular prisoners gikan sa Cebu City Jail ang gitakda na usab nga ihatod ngadto sa New Bilibid Prisons sa Muntinlupa sumala pa ni Jail Warden Superintendent Efren Nemenio human usab maaprubahi ang gahin nga gamiton alang sa maong katuyoan.

Nagkanayon si Nemenio nga kini na maoy ika-unom nilang pagpadala og mga insular prisoner ngadto sa kauluhan.

Ang insular prisoner mao kadtong piniriso nga nahukmang mabilanggo og labing minos unom ka tuig isip silot sa krimen nga nahimo niini.

Matod ni Nemenio nga ang ilang pagpadala og mga piniriso ngadto sa New Bilibid Prisons maoy kabahin sa ilang decongestion program sa bilanggoan.

Ang nahisgutang bilanggoan duna karoy kapin sa 2 mil ka mga piniriso ug kapin pa usab sa usa ka gatos niini ang mga insular prisoner.

Gipadayag ni Nemenio nga dili nila mausa pagpadala ngadto sa Muntinlupa ang mga insular prisoner tungod usab sa limitado nilang pundo.

Subay niini nangandoy si Nemenio nga duawon pagbalik sa Justice on Wheels ang City Jail aron mapadali ang husay sa mga kaso nga giatubang sa ubang mga piniriso tungod kay duna pay ubang insular prisoners ug mga akusadong wala pa matagad ang mga kaso. (Elly Bolonos)    .   (BANATNEWS)