CEBU, Philippines - Gipanalipdan ni Undersecretary Atty. Paul Oaminal, Vice-Chairman sa Dangerous Drugs Board (DDB) ang gihimong aksyon sa mga sakop sa Philippine Drug Enforcement Agency (PDEA ) agents sa nabulabog nga buy bust operation sa Dark Planet Bar niadtong milabay’ng gabii diha sa dalan Osmeña Boulevard ning dakbayan sa Sugbu.
Si Oaminal nagkanayon nga kabahin kini sa gihingusgan kampanya ni Cebu City Mayor Tomas Osmeña nga apilon ang mga imnanan pagmonitor tungod kay breeding grounds sa mga drug addicts ang maong mga dapit.
“As drinking liquors among the youth go side by side with experimenting on drugs,” matud pang Oaminal.
Sumala pa nga kadudahan ang gihimo sa usa ka gwardiya nga maoy nakapa-alerto ug mitawag sa kapulisan nga gi-dis-armahan na human masutang walay lisensya.
Hinuon iyang gimandoan ang mga ahente sa pagsang-at og kaso sa guwardiya, security agency ug sa tagdumala sa Dark Planet.
Si Oaminal miawhag sa konseho sa dakbayan sa Sugbu, labi na kang Councilor Sylvan Jakosalem pagsusi sa permit sa Dark Planet.
Sa initial reports, nasuta nga walay liquor permit ang maong bar. Gi-awhag niini ang PDEA, kapulisan ug uban pang law enforcement units nga dili hunongan ang ilang kampanya sa anti-drugs diha sa mga restobars gikatahong maoy taguanan sa nagpalusot sa illegal drugas. (BANATNEWS)