CEBU, Philippines - Patay nang napalgan ang usa ka batan-ong lalaki kinsa gituohang gisaka ug gidunggab sulod sa iyang balay sa barangay Banca, dakbayan sa Lapulapu sa miaging gabii.
Ang namatay mao si Ricardo Inot, 25, samtang padayon pa ang kapolisan sa pagtumbok sa mamumuno ug sa motibo niini.
Si PO3 Candido Baringue nagkanayon nga ilang gituohan nga nahinanok og katulog ang biktima ug nag-inusara dihang gisaka sa wala hiilhing mamumuno.
Usa ka dakong samad sa liog ang naangkon sa biktima nga gituohang gidunggab ug maoy nakaingon sa kamatayon niini.
Sa laing bahin naangol usab ang usa ka 20 anyos nga lalaki sa sitio Boot, barangay Punta Ingano sa dakbayan sa Lapulapu dihang naigo sa paa sa saag nga bala.
Ang biktima mao si Jojet Baculado, nagpuyo usab sa maong dapit kinsa nakabaton og samad pinusilan sa iyang paa atol sa miulbong karambola sulod sa diskohan nga pahinungod sa pista sa maong sitio.
Matud pa kalit nagrambol ang grupo sa mga batan-on ug kalit nga may buto sa armas nga nadunggan ug nabatyagan nalang niining nasamdan na siya sa paa, ang biktima gidala sa Mactan Doctors Hospital ug luwas na kini sa kuyaw nga kahimtang. (Romeo Limpangog) (BANATNEWS)