CEBU, Philippines - Miani og pagsaway ug nagbunga og tensiyon sa katawhan ang pagpatak-op sa usa ka "water works system" sa sitio Mahayahay, barangay Bankal dakbayan sa Lapulapu kagahapon sa buntag.
Ang kapolisan daling mipadala og mga sakop diha sa dapit tungod sa pagsupak sa mga molupyo sa kamandoan ni Mayor Arturo Radaza.
Si Supt. Clifford Gairanod ang Lapulapu City Police Office Deputy Director for Operations nagkanayon gipirmahan ni Lando Duero ang Secretary to the Mayor ang kamandoan aron pasirad-an ang tinubdan sa tubig nga nahimutang sa maong dapit nga gipanag-iya ni Cesario Silawan ang Silawan Water Works System.
Matud pa ni Supt. Gairanod nga sa milabay’ng adlaw pa unta ihatod sa City Engineering Office ang maong kamanduan, apan wala kini mahinayon gumikan sa kahadlok sa sinakong mga bato nga giandam sa mga residente kung ugaling ihinayon gyud ang pagpaputol sa linya sa maong tubig.
Gumikan niini mihangyo ang mga sakop sa City Engineers Office nga magpakuyog og polis ug sa Crowd Dispersal Management kon CDM nga gipangulohan ni Gairanod.
Atol sa implementasyon mitumaw ang tensiyon human sa pipila ka mga residente namato sa mga tinugyanan sa balaod hinungdan nga kini gipanggukod sa mga pulis ug usa ka minor de edad ang nasikop.
Si Duero nga nahinabi sa Banat News mipadayag nga may kalapasan si Silawan sa pag-operate og water works system sumala pa sa rekomendasyon sa City Legal Office pinaagi ni Atty. Joseph Vincent Lim.
Matud pa ni Duero nga si Silawan gihatagan lang og permiso sa National Water Resource Board kun NWRB ug sa MCWD nga maka-supply og tubig balor 6.6 cubic meter o unom ka libong litro matag adlaw, apan nasuta sa kagamhanang lokal misobra na kini ug gani midugang pa og laing tinubdan si Silawan nga supak usab sa ilang gikasabutan tali sa NWRB, MCWD ug sa dakbayan sa Lapulapu. (BANATNEWS)