CEBU, Philippines - Pakigtagboan sa mga opisyal sa Cebu City Jail ang labing minos 40 ka mga lider sa maong bilanggoan aron konsultahon kun kini mohatag ba usab og donasyon ngadto sa liboan ka mga biktima sa baha didto sa kauluhan.
Kini human midonar og relief goods ang mga piniriso sa Mandaue City Jail ug cash donation usab ang gitunol sa mga inmates sa Cebu Provincial Detention and Rehabilitation Center (CPDRC).
Gusto ni City Jail Warden Superintendent Efren Nemenio nga ang mga binilanggo mismo maoy boluntaryong mopasiugda sa ilang kaugalingong relief operation.
“Ako silang ipatawag ug usab kun unsa gyud ang ilang gusto nga buhaton ba kay ang atong gilikayan ana kung kitay mopasiugda mahimo na usab nga issue ba bati kaayo kay instead nga ang atong purpose nindot, mahug unya nga dautan, so, ato gyud silang hatagan og freewill kay buluntaryo ra man na,” sumala ni Nemenio.
Gitataw ni Nemenio nga walay income ang mga binilanggo sa City Jail dili sama sa CPDRC inmates nga dunay mga donasyon tungod sa pagkainila niini sa pagsayaw.
Gipadayag hinuon sa Jail Warden nga mahimong sundugon sa mga piniriso sa Cebu City Jail ang gihimo sa mga binilanggo sa Mandaue City Jail.
Kini pinaagi usab sa paghatag og pahat sa ilang meal allowance matag adlaw ug igahin alang sa mga biktima sa baha didto sa Luzon.
Apan giklaro ni Nemenio nga gikinahanglang ang mga inmates mismo maoy mosugyot niini ug dili silang mga tagdumala sa City Jail.
Ang nahisgutang bilanggoan sa dakbayan duna karoy kapin sa dos mil ka mga piniriso lakip na sa mga insular prisoner nga gitakdang ipadala ngadto sa Muntinlupa.
Gibutyag hinoon ni Nemenio nga ang mga personnel sa Cebu City Jail nihatag na sa ilang kontribusyon “in cash or in kind” ngadto sa mga flood victim.
Kini pinaagi usab sa ilang rehiyonal nga buhatan nga giingong mao usab ang mopadala sa ilang donasyon ngadto sa kauluhan. (BANATNEWS)