CEBU, Philippines - Sugdan na karong adlaw’ng Domingo ang pagpatuman sa kamanduan ni Arsobispo Ricardo Cardinal Vidal nga mopahigayon og special collection aron itabang ngadto sa mga nabiktima sa bagyong Ondoy.
Sumala pa ni Msgr. Esteban Binghay, episcopal vicar sa Artsidyosesis sa Sugbo mipadangat og circular ngadto sa tanang mga simbahan, mga shrines ug mga pilgrim centers nga mopahigayon og second collection alang sa mga biktima sa bagyo.
Apan gitataw ni Msgr. Binghay nga nagkasabot na sila niadtong Sityembre 28 sa pagpatuman niini ug iyang giklarong kwarta ug tseke lamang ang ilang dawaton aron dali ang paghatod sa maong tabang.
Iya lamang nga gitambagan ang mga tawo nga moduol sa mga drop-off centers sa mga non-government organizations (NGO) aron makapadala og hinabang sa mga biktima ni Ondoy. (BANATNEWS)