CEBU, Philippines - Gipatawag sa kabomberohan sa dakbayan sa Mandaue ang pipila ka mga biktima sa sunog sa sitio Mangga sa barangay Opao, dakbayan sa Mandaue sa pagsuta sa hinungdan sa kalit lang nga pag-ulbo sa kalayo nga miugdaw sa gatusan ka panimalay ug mikalas sa kinabuhi sa usa ka ginang.
Si Mandaue City Fire Marshall Oscar Mayol nga nahinabi sa Banat News miingon nga dili pa nila matataw ang hinungdan sa kalit nga pag-ulbo sa kalayo nga giingong nagsugod sa panimalay sa pamilyang Soronio.
Matud pa ni Mayol nga ang iyang mga imbestigador padayon pang naghipos og mga kasayuran gikan sa mga biktima alang sa pagsuta sa tinud-anay nga hinungdan sa maong sunog.
Si Mayol miingon nga nanggawas ang mga huhungihong nga tinuyo ang maong sunog, gisusi usab ang posibilidad nga ang hinungdan sa pag-ulbo sa kalayo mao ang kuryente ug giingon ang usa ka batang nagdula-dula og miduslit og posporo. Gitataw ni City Fire Marshall Mayol nga hagip-ot kaayo ang dalan ug layo usab ang nahimutangan sa mga panimalay nga nasunog maong nalangan gyud sila sa pagpawong niini.
Ang kabomberohan misumpay-sumpay pa sa ilang mga hose aron maabot ang tubig sa mga panimalay nga kasagaran ginama sa light materials.
Si Mayol miingon nga mokabat sa 90 kapin ka mga panimalay ang na-ugdaw ug lima ngadto sa unom ang partially damage.
Samtang ang dakbayan sa Mandaue mohatag og libreng rasyon sa pagkaon sulod sa tulo ka adlaw sa mga biktima sumala pang Jeffrey Mirafuentes sa City Social Welfare and Development.
Matud pang Mirafuentes sa Banat News nga kasamtangang gibutang ang mga nasunogan sa gymnasium sa barangay Opao.(BANATNEWS)