CEBU, Philippines -Pabiling bukas si Cebu City Councilor Hilario Davide III sa posibilidad pagpapili pagka-bise gobernador sa lalawigan sa Sugbu sa sunod tuig nga eleksyon.
Ang konsehal maoy gituboy ni Mayor Tomas Osmeña nga ipares kang Tourism Secretary Joseph “Ace” Durano nga unang giduso niini nga mag-gobernador.
Apan kuli na ang maong posibilidad human ipahibawo sa pamilyang Durano nga pagka-senador ang daganan sa kalihim sa turismo.
Usa hinoon sa mitumaw nga ngalan atol sa pagbanhaw sa Partido Panaghiusa sa probinsya mao ang anak ni kanhi gobernador Emilio “Lito” Osmeña.
Kini mao si Mariano Antonio “Mimo” Osmeña nga una nang gihulagway ni Mayor Osmeña nga batan-on, utokan ug buotan nga pagkatawo.
Gani gipahibawo nang daan sa mayor nga siya andam mosuporta sa iyang pag-umangkon kung kini magpapili pagka-gobernador sa Sugbu.
Subay niini, gipadayag ni Davide ang iyang kaandam nga mag-bise gobernador kang Mimo kung kini makahukom pagsulod sa politika sa 2010 elections.
Gitataw sa konsehal nga siya komportable kang Mimo tungod kay sila daan nang kaila niini sukad sa ilang pagtungha sa kinder ngadto na sa elementarya.
Gitataw hinoon ni Davide nga siya andam magpasubli pagkakonsehal sa siyudad kung walay mokuha kaniya alang sa pagka-bise gobernador sa lalawigan.
Wala pa hinoon matino kung interesado ba si Mimo nga muatbang kang Gobernador Gwendolyn Garcia sa umaabot nga piniliay. (Elly Bolonos) (BANATNEWS)