CEBU, Philippines -Aduna nay lead ang kapulisan sa lungsod sa Daanbantayan pagtumbok sa suspek ug sa motibo sa pagpamusil patay sa usa ka ginang kauban sa 10 anyos nga anak niini didto sa barangay Malbago sa maong lungsod niadtong Sabado sa buntag. Gibutyag ni SPO3 Cesar Alburo, imbistigador sa Daanbantayan Police dihang nahinabi sa Banat News nga personal nga bangi sa pamilya ang sentro nga gitutokan sa kapulisan sa nagpadayong imbistigasyon.
Matud ni SPO3 Alburo nga nagpadayon ang ilang hot pursuit operation sa suspek apan mikalma kay na bisi sila sa pagpangandam sa gipahigayong Annual General Inspection (AGI).
Si SPO3 Alburo nagkanayon nga subay sa ilang inisyal nga pakisusi bugtong ang mga kabanay lang sa biktima ang nakahibawo nga mopauli kini niadtong higayona gikan sa dakbayan sa Sugbo.
Kini human ang bana niini nanawag sa iyang amahan nga si Gomer Pino nianang pagkagabii nga ipa-andam ang mga dokumento sa yuta tungod kay kuhaon kini sa iyang asawa pagka buntag.
Nasayran nga utangan og dakong kantidad nga kwarta ang ugangan niini ngadto sa pamilya sa biktima ug buot unta kuhaon niini ang deklarasyon sa yuta isip colatteral hinungdan nga mipauli kini sa maong lungsod.
Apan pag-abot sa maong lugar samtang naglakaw sa dalan kalit lang mitunga gikan sa kalibunan ang suspek dayong pusil sa biktima sa ulo hinungdan sa hinanaling kamatayon niini, samtang ang 10 anyos niyang anak abtik nga nakadagan pahilayo ug maoy nakahatag og giya sa kapolisan bahin sa suspek nga matud pa nagkawo kini og orange ug nagtaptap og panyo sa nawong.
Matud ni SPO3 Alburo nga layo ra kaayo ang posibilidad nga pagpanulis ang motibo sa kremin sanglit nakuha man ang pink nga bag sa biktima nga nakit-an sa usa ka tanod oug gi-turn over kini ngadto sa buhatan sa kapulisan nga may sulod nga P800. (Darrel A. Carumba) (BANATNEWS)